സംസ്ഥാനത്തെ 589 തദ്ദേശ സ്വയംഭരണ സ്ഥാപനങ്ങള്ക്ക് ശുചിത്വ പദവി
സംസ്ഥാനത്തിന്റെ 12 ഇന പരിപാടിയില് 500 ഗ്രാമപഞ്ചായത്തുകളെയും 50 നഗരസഭകളെയും ശുചിത്വ പദവിയില് എത്തിക്കുമെന്ന് സര്ക്കാര് പ്രഖ്യാപിച്ചിരുന്നു. ഇതിനെതുടര്ന്ന് തദ്ദേശ സ്വയംഭരണ വകുപ്പിന്റെ നേതൃത്വത്തില് ഹരിതകേരളം മിഷന്, ശുചിത്വ മിഷന്, ക്ലീന്കേരള കമ്പനി, കുടുംബശ്രീ, തൊഴിലുറപ്പ് മിഷന് എന്നിവ സംയുക്തമായി ആവിഷ്കരിച്ച നടപടിക്രമങ്ങളിലൂടെയാണ് ഖരമാലിന്യ സംസ്കരണത്തില് മികവു തെളിയിച്ച തദ്ദേശ സ്വയംഭരണ സ്ഥാപനങ്ങളെ ശുചിത്വ പദവിക്കായി തിരഞ്ഞെടുത്തത്. 501 ഗ്രാമപഞ്ചായത്തുകളും 58 നഗരസഭകളും 30 ബ്ലോക്കുപഞ്ചായത്തുകളുമാണ് നേട്ടം കൈവരിച്ചത്.
സമ്പൂര്ണ്ണ ശുചിത്വ പദവിയിലേക്കുള്ള ആദ്യ പടിയാണ് ഖരമാലിന്യ സംസ്കരണത്തില് മികവുതെളിയിച്ച തദ്ദേശ സ്ഥാപനങ്ങള്ക്ക് നല്കുന്ന ശുചിത്വ പദവി. ഖരമാലിന്യത്തിന് പുറമേ ദ്രവ- വാതക മാലിന്യ സംസ്കരണ മാര്ഗ്ഗങ്ങളുള്പ്പെടെ ശുചിത്വ മാലിന്യ സംസ്കരണ രംഗത്തെ സകല ഘടകങ്ങളും പ്രാവര്ത്തികമാക്കുമ്പോള് തദ്ദേശ സ്ഥാപനങ്ങള്ക്ക് സമ്പൂര്ണ്ണ ശുചിത്വ പദവി നല്കും. തദ്ദേശ സ്വയംഭരണ സ്ഥാപനങ്ങള് ഇപ്പോള് കൈവരിച്ച നേട്ടത്തിലൂടെ സംസ്ഥാനത്തിന്റെ പകുതിയിലേറെ ഭൂപ്രദേശത്ത് ശാസ്ത്രീയ ഖരമാലിന്യ സംസ്കരണം പരമാവധി പ്രാവര്ത്തികമാക്കപ്പെടുകയാ യാണ് .
ജൈവ മാലിന്യം ഉറവിടത്തില് സംസ്കരിക്കുക, അജൈവ മാലിന്യ സംസ്കരണത്തിനാവശ്യമായ സംവിധാനം സജ്ജമാക്കുക, അജൈവ മാലിന്യ ശേഖരണത്തിന് ഹരിത കര്മ്മസേനയുടെ സേവനവും സൂക്ഷിക്കുന്നതിന് മെറ്റീരിയല് കളക്ഷന് ഫെസിലിറ്റിയും ഒരുക്കുക, പൊതു സ്ഥലങ്ങള് മാലിന്യമുക്തമാക്കുക, സര്ക്കാര് ഓഫീസുകളിലും പൊതു സ്വകാര്യ ചടങ്ങുകളിലും ഗ്രീന് പ്രോട്ടോക്കോള് നടപ്പിലാക്കുക തുടങ്ങി 20 നിബന്ധനകള് സൂചകങ്ങളായി നിശ്ചയിച്ചുള്ള സര്ക്കാര് ഉത്തരവ് പാലിച്ചാണ് ശുചിത്വ പദവി നിര്ണ്ണയം നടത്തിയത്. 100 ല് 60 മാര്ക്കിനു മുകളില് ലഭിച്ച തദ്ദേശ സ്വംയംഭരണ സ്ഥാപനങ്ങളാണ് ശുചിത്വ പദവിക്ക് അര്ഹത നേടിയത്.